Qatysýshylarǵa arnalǵan alǵy sózinde Q. Mámı atap ótkendeı, Qazaqstanda jas ǵalymdardyń halyqaralyq forýmyn ótkizý jaqsy dástúrge aınaldy. Ol ǵylym, bilim berý jáne ınnovasııalar salasyndaǵy ózekti máselelerdi talqylaý boıynsha bedeldi pikirtalas alańy bolyp otyr. Osy jyly forým erekshe mańyzǵa ıe, óıtkeni Qazaqstanda Jastar jyly aıasynda uıymdastyrylǵan.
Spıker Respýblıkanyń Tuńǵysh Prezıdenti – Elbasy N.Á. Nazarbaev bastama jasaǵan, qazaqstandyqtardyń jas býynyna shetelde joǵary bilim alýǵa biregeı múmkindik beretin «Bolashaq» stıpendııasynyń mańyzdylyǵyn atap ótti. Onyń aıtýynsha, qarqyndy damý men zamanaýı syn-qaterler qoǵam men memleket aldynda jańa mindetter qoıady. Bul proseste saıası-quqyqtyq, ekonomıkalyq jáne mádenı-gýmanıtarlyq salalar evolıýsııasynyń vektorlaryn aıqyndaıtyn Konstıtýsııa mańyzdy ról atqarady. Ǵylymı zertteýlerdiń nátıjeleri Konstıtýsııada bekitilgen jalpy adamzattyq qundylyqtardy júzege asyrýǵa qyzmet etýi tıis, - dedi Konstıtýsııalyq Keńestiń Tóraǵasy.
12 eldiń jas ǵalymdary aldynda sóz sóıleý barysynda Q. Mámı Abaı Qunanbaevtyń 175 jyldyǵyna arnalǵan estafetany jalǵastyryp, Uly aqynnyń 38-shi qara sózinen úzindi keltirdi. Onda «Áýeli adamnyń adamdyǵy aqyl, ǵylym degen nárselermenen. Qashan bir bala ǵylym, bilimdi mahabbatpenen kókserlik bolsa, sonda ǵana onyń aty adam bolady. Mal, maqtan, ǵızzat-qurmet adamdy ózi izdep tapsa, adamdyqty buzbaıdy hám kórik bolady. Hakimder uıqy, tynyshtyq, áýes-qyzyqtyń bárin qoıyp, adam balasyna paıdaly is shyǵarmaqlyǵyna, ıaǵnı adam balasynyń aqyl-pikirin ustartyp, haq penen batyldyqty aıyrmaqty úıretkendigi, bizdiń olarǵa mindetkerligimizge daý joq.», delingen. Osy asyl murany tilge tıek ete otyryp, jastardyń barlyq izdenisterine sáttilik tiledi.
